Elsa Roldán & David Maceira

En 2026, a emblemática Catedral de Tui celebra o seu 800.º aniversario. O IKFEM Festival Tui-Valença non podía deixar de sumarse a esta conmemoración. E que mellor maneira de facelo que a través do talento musical novo, cun concerto moi especial na Catedral, incorporando repertorio procedente do Arquivo da Catedral e interactuando co patrimonio e coa instalación artística do creador Carlos Fer, que durante os meses de xuño, xullo e agosto renderá homenaxe a esta efeméride desde as artes plásticas.

Así, o domingo 19 de xullo, o público poderá gozar de:

Elsa Roldán & David Maceira

Elsa Roldán é unha cantante lírica nada en Tui no ano 2000, cunha sólida formación internacional. Comezou estudando violín desde moi pequena, pero axiña se especializou en canto, formándose no Royal Conservatoire of Scotland e posteriormente na Escola Superior de Canto de Madrid, onde se graduou con Matrícula de Honra. Actualmente continúa o seu perfeccionamento no Máster da Escola Superior de Música Raíña Sofía, dentro da Cátedra Alfredo Kraus. Interpretou papeis en ópera e zarzuela, recibiu premios internacionais e participou en importantes producións e concertos en Europa, Asia e España, destacando pola súa versatilidade en repertorio sinfónico, lírico e de cámara.

David Maceira é un organista galego nacido en Santiago de Compostela en 1997, especializado en órgano clásico e improvisación. Formouse no Conservatorio de Ourense e posteriormente na ESMUC de Barcelona, onde estudou con referentes como Juan de la Rubia. Foi premiado en concursos estatais e ampliou a súa formación con destacadas figuras do órgano europeo. É organista titular da Catedral de Santiago de Compostela desde 2022 e desenvolve unha intensa actividade concertística que o levou a actuar en España e Portugal, ademais de colaborar con formacións como a Real Filharmonía de Galicia.