-
- Final Novas Ondas Sonoras 2025
Na 13ª edición do IKFEM Festival Tui – Valença naceu unha nova iniciativa destinada a fomentar o talento dos mozos intérpretes da Eurorrexión Galicia – Norte de Portugal: o concurso Novas Ondas Sonoras.
Novas Ondas Sonoras 2025
Esta proposta ten como obxectivo descubrir e promover os talentos do futuro, transcendendo fronteiras entre España e Portugal a través da música.
O concurso estivo aberto mediante unha convocatoria en liña a mozos e mozas de entre 12 e 30 anos, que presentaron repertorios moi variados. Un xurado profesional seleccionou os seis grupos que accederon á fase final.
Finalistas
Nesta primeira edición, os seis finalistas foron:
- La Mmarca (Salvaterra/Tui) – Banda composta por piano, guitarra, trompeta, baixo e batería.
• Flat Nine (Tui/A Coruña) – Trío de jazz formado por clarinete, piano e batería.
• Trío Dorna (A Coruña/Betanzos) – Formación clásica de violín, violonchelo e piano.
• Comboíños (Tomiño/A Guarda) – Grupo de pop integrado por novos talentos de 14 anos.
• Trío Marea (Ourense/Vigo/Cangas) – Ensemble con dous violonchelos e piano.
• Benedito Cerqueira (Viana do Castelo) – Violonchelista de 17 anos seleccionado mediante votación do público.
Final Novas Ondas Sonoras 2025
A final celebrouse o 4 de outubro de 2025 no Teatro Municipal de Tui, coa presenza de autoridades de Tui e Valença, así como da Xunta de Galicia. O evento estivo presentado por Paula Montes e Paulo Reis, e contou cun público entusiasta que gozou de cada actuación.
O xurado, composto por Andrea González, Noemí Dalmau e Vanesa Nunes, tivo a difícil tarefa de decidir o gañador do premio Novas Ondas Sonoras, que consistía nun trofeo da artista CH Sueiro e nun premio de 1.000 €, destinado a financiar unha actuación na próxima edición do festival.
Finalmente, o grupo gañador desta primeira edición foi La MMarca, que terá a oportunidade de actuar na 14ª edición do IKFEM Festival Tui – Valença.
Máis alá de premiar aos mellores intérpretes, Novas Ondas Sonoras busca fortalecer os vínculos culturais entre Galicia e o Norte de Portugal, creando un espazo de visibilidade e proxección para as novas xeracións de artistas no ámbito das ensinanzas artísticas.
